2022 жылдың 1 тоқсанында атқарылған жұмыстардың нәтижесі талқыланған жиында Жетісай ауданында былтырғы жылмен салыстырғанда құқық бұзушылықтар саны 31,8%-ға кемігендігі айтылды деп хабарлайды aqparaqnews.kz порталы.
Жетісай ауданы полиция бөлімінің бастығы, полиция полковнигі Ермахан Абдраманов жедел кеңес ұйымдастырды. Жиын Жетісай АПБ-ның мәжіліс залында, арнайы жеке құрамның қатысуымен өтті. Онда 2022 жылдың 1 тоқсанында атқарылған жұмыстардың нәтижесі талқыланды. Атап айтар болсақ, жыл басынан бері Жетісай ауданында былтырғы жылмен салыстырғанда құқық бұзушылықтар саны 31,8%-ға кеміген. Тәртіп сақшыларының қырағылығының арқасында алаяқтық қылмысы 56,8%-ға азайып отыр. Аудан аумағында мал ұрлығы қылмысының алдын алып, үш жақты жасалған келісім шарт негізінде мал ұрлығы 22,2%-ға төмендеген. Өткен жылға қарағанда қылмыстардың алдын алу мақсатында жасалған жұмыстардың нәтижесінде бұрын сотты болғандармен жасалған қылмыстар 33,3%-ға азайған. Шара барысында осы жылдың 3 айында болған кемшіліктер ашық талқыланып, қоғамдық тәртіпті сақтау, құқыққа қарсы іс-әрекеттердің алдын алуда жіберілетін қателіктерді жою, келешекте болдырмау, сондай-ақ, жеке құрамның жедел-профилактикалық жұмыс барысын жандандыру бағытында алдағы уақыттағы жұмыс жоспарлары айтылды. Жиын соңында ҚР Президенті, ҚР ІІМ және Түркістан облысы Полиция департаменті басшыларының талаптары мен бұйрықтары жеке құрам назарына жеткізілді.